Дарханы Нэгдсэн эмнэлгийн хотхоныг 1972 онд барьж байгуулсан. Дарханаас гадна Сэлэнгэ, Булган, Орхон зэрэг зэргэлдээ аймаг, сумдын иргэд тус эмнэлгээс эрүүл мэндийн тусламж үйлчилгээ авдаг.

Хүн амын өсөлт, төвлөрөл нэмэгдэхийн хэрээр эрүүл мэндийн тусламж үйлчилгээний чанарыг сайжруулж, хүртээмжийг нэмэгдүүлэх хэрэгцээ шаардлага бодитоор үүссэн. Тиймээс УИХ-ын гишүүн, Сангийн сайд Б.Жавхлангийн санаачилгаар төвийн бүсийн Нэгдсэн эмнэлгийн төслийг Европын Сэргээн босголт, Хөгжлийн банктай хамтран Дархан-Уул аймагт хэрэгжүүлэхээр боллоо.

Энэ сарын 16,17-ны өдрүүдэд Европын Сэргээн босголт, Хөгжлийн банкны Дэд Ерөнхийлөгч Аннемари Страатхоф, тус банкны Төв Азийн бүсийн захирал Сюзана Харгитай, Монгол дахь суурин төлөөлөгч Ханнес Такач нар манай аймагт ажиллаж төслийн талаар орон нутгийн удирдлагуудтай болон сангийн сайдтай санал солилцож, төсөл хэрэгжүүлэх газрын байршилтай танилцсан юм.

Европын Сэргээн босголт, Хөгжлийн банкнаас аливаа орон нутаг, бүс нутгуудыг хөгжүүлэх, хүмүүсийн амьдрах орчин, дэд бүтцийг сайжруулахад таатай хүлээн авдаг. Энэ ч үүднээс Дархан-Уул аймагт нэн шаардлагатай 250 ортой, амбулаторийн иж бүрэн тоноглолтой шинэ эмнэлгийн төслийг дэмжин орон нутагтай хамтран ажиллахаа илэрхийллээ.

Шинэ эмнэлгийг Дархан сумын 13 дугаар багт байрлах одоогийн Нэгдсэн эмнэлгийн урд байгуулахаар орон нутгаас 5 га газрыг шийдвэрлээд байна. Төсөл амжилттай хэрэгжсэнээр төвийн бүсийн иргэдэд үзүүлэх эрүүл мэндийн тусламж үйлчилгээ сайжрахаас гадна Улаанбаатар хот руу эрүүл мэндийн үйлчилгээ авахаар зорих иргэдийн урсгалыг сааруулах, ачааллыг бууруулах, нийслэлийн хүн амын хэт төвлөрлийг сааруулах томоохон ач холбогдолтой юм.

Европын Сэргээн босголт, Хөгжлийн банкнаас худалдаа эдийн засгийн томоохон коридор болох Улаанбаатар-Дарханы замын 2 эгнээг өргөтгөх, шинэчлэх томоохон төслийг санхүүжүүлж байгаа. Ийнхүү Найрамдалын Дарханд бас нэгэн том төсөлд дэмжлэг үзүүлэн хамтран ажиллах эхлэлийг тавьлаа.